Contoh Geguritan

Kepiye Dadine

Kembang sore wus ilang gandane
Banyu kali wis ajeg mili
Bener Kandane kae
Rendheng ora bisa ndhodhok, ketiga ora bisa cewok

Manuk gagak lunjak-lunjak nanging wulune ora njanges
maneh Nadyan kekitera ngubengi wuwungan
Nanging wis ora di percaya weh sasmita

Gelang-gelang kumrincing ing wancil lingsir wengi
Sajake wis ora gawe miris lan mrinding
Kepiye dhadine...............



Sawangen, among tani padha njola
Ngrumat panenane wae ora bisa
Dicegat pegijon diluru nganti pantok galengan
Kepiye dadine...................

Aja ngira jamane wis beda,
Wong ngemis dhuwite mayuta yuta
Panguwasa gagah padha rebutan ngrayah duwit rakyat
Sing kebangeten piwulang diwalik grembyang
Becik katampik sing ala katampa..... donya.........donya,
Kepiye dadine

Apa kelakon besuk ana sing duwe omah ditundhung lunga?
Anak lali wong tua, bakal tuwuh srengenge tanpa cahya?
Kepiye dadine

Sumber Derap Guru Jateng Oleh : Dwi Yatmoko